Fjalori i zejeve

Cili mjeshtër të duhet për cilën punë?

Gjej problemin me fjalët e tua dhe shiko cili zanat e zgjidh. Për çmime orientuese shiko çmimet sipas shërbimit; para se të pranosh ofertën, kalo listën e kontrollit.

Rubineti pikon, lavamani ose tualeti është bllokuar

Hidraulik. Riparimet e rubinetave, sifonëve dhe kazanëve të tualetit, zhbllokimi i kanalizimit dhe ndërrimi i tubave janë punë hidrauliku. Nëse uji del nga muri ose nga dyshemeja, thirre sa më shpejt — rrjedhja e fshehur dëmton suvanë dhe dyshemenë.

• Punë Hidraulike

Bie siguresa, priza nuk punon ose drita dridhet

Elektricist. Çdo punë në instalimin elektrik — priza, çelësa, ndriçim, tabela e siguresave, linja të reja — i takon elektricistit. Mos e hap tabelën vetë: një defekt që ripërsëritet është shenjë e një problemi në instalim, jo te pajisja.

• Punë elektrike

Klima nuk ftoh, kaldaja nuk ndizet ose radiatorët mbeten të ftohtë

Teknik klimash dhe ngrohjeje. Montimi, servisimi dhe mbushja me gaz e klimave, si dhe kaldajat, radiatorët dhe ngrohja qendrore, bëhen nga teknikë të specializuar. Servisimi para sezonit është më i lirë se riparimi në mes të dimrit ose verës.

• Klima & Ngrohje

Muret kanë lagështi, njolla ose boja po zhvishet

Moler (lyerës). Lyerja, patinimi dhe gletimi i mureve i takojnë molerit. Nëse njollat kthehen pas lyerjes, shkaku zakonisht është lagështia — atëherë fillimisht duhet gjetur burimi (hidraulik ose izolim) e pastaj lyer.

• Moler

Dua mur ndarës, tavan të varur ose ndriçim LED në tavan

Mjeshtër knaufi (gipsi). Muret ndarëse dhe tavanet e varura me knauf (rigips), tavanet dekorative dhe izolimi akustik me panele gipsi bëhen nga mjeshtrat e knaufit. Për ndriçimin brenda tavanit duhet edhe elektricisti — mirë është të koordinohen që në fillim.

• Knauf & Gips

Pllakat janë thyer, fugat janë nxirë ose dua banjë të re

Mjeshtër pllakash dhe qeramike. Shtrimi i pllakave dhe qeramikës, fugimi dhe hidroizolimi nën pllaka janë punë e pllakaxhiut. Në rinovimin e banjos, hidrauliku dhe elektricisti punojnë para tij — pllakat vendosen të fundit.

• Pllaka & Qeramikë

Dysheme e re me laminat ose parket, apo parket i vjetër që duhet lustruar

Mjeshtër laminati dhe parketi. Shtrimi i laminatit dhe parketit, nënshtresat, shiritat anësorë dhe lustrimi e llakimi i parketit të vjetër bëhen nga mjeshtri i dyshemeve. Dyshemeja duhet të jetë e thatë dhe e niveluar para shtrimit.

Dera nuk mbyllet mirë, dollapi është prishur ose dua mobilie me porosi

Marangoz (zdrukthëtar). Mobiliet me porosi, dollapët e kuzhinës, dyert e brendshme dhe riparimi i tyre i takojnë marangozit. Për kuzhinë të re, mat hapësirën bashkë me të para se të blesh pajisjet.

• Montim & Rregullim Mobiljesh

Dritaret lënë ajër, doreza është prishur ose dua dritare të reja

Mjeshtër dyersh dhe dritaresh (PVC/alumin). Rregullimi i dritareve dhe dyerve PVC ose alumini, ndërrimi i gomave dhe i dorezave, si dhe montimi i dritareve të reja, bëhen nga mjeshtrat e dyer-dritareve.

• Dyer & Dritare

Fasada ka plasaritje ose shtëpia humb shumë ngrohje

Mjeshtër fasade dhe izolimi. Termoizolimi i fasadës, suvatimi i jashtëm dhe riparimi i plasaritjeve bëhen nga ekipet e fasadave. Plasaritjet e thella ose që zgjerohen duhet t'i shohë fillimisht një inxhinier.

• Suvatim

Kulmi pikon ose duhet ndërruar tjegulla

Mjeshtër kulmi. Riparimi dhe ndërrimi i kulmit, tjegullave, ulluqeve dhe hidroizolimi i tarracave bëhen nga mjeshtrat e kulmeve. Pas një rrjedhjeje, kontrollo edhe tavanin dhe izolimin nën të.

Dua kamera sigurie, alarm ose interfon

Instalues i sistemeve të sigurisë. Kamerat e sigurisë, sistemet e alarmit, interfonët dhe qasja me kartelë instalohen nga teknikë të sigurisë. Pyet ku ruhen regjistrimet dhe si i sheh nga telefoni.

• Kamera sigurie & Alarme

Duhet gërmuar për themele, kanalizim ose gropë septike

Operator bageri. Gërmimet për themele, kanalizim dhe gropa septike, nivelimi i terrenit dhe largimi i dheut bëhen me bager dhe kamion. Para gërmimit, pyet për instalimet nëntokësore (ujë, rrymë) në atë vend.

• Gërmime & Bager

Pastrim pas rinovimit, larje tepihash ose mirëmbajtje e rregullt

Shërbim pastrimi. Pastrimi pas punimeve, larja e tepihave dhe mirëmbajtja e rregullt e shtëpisë ose zyrës bëhen nga shërbimet e pastrimit. Pastrimi pas rinovimit kërkon pajisje tjera nga pastrimi i zakonshëm — thuaje që në kërkesë.

• Mirëmbajtje Industriale
• Pastrim dhe mirëmbajtje