Siguria dhe besimi

Siguria në Kryje

Kjo faqe shpjegon konkretisht se çfarë kontrollojmë ne, çfarë nuk mund ta garantojmë dhe çfarë mund të bësh vetë që puna të shkojë mirë.

Si verifikohen mjeshtrit

Shenja "I verifikuar" te një profil do të thotë se kemi kontrolluar dokumentet e dërguara nga mjeshtri:

• Identiteti — dokument identifikimi i vlefshëm, që emri në profil të përputhet me personin real.
• Kontakti — numër telefoni i konfirmuar me kod SMS, dhe/ose email i konfirmuar.
• Biznesi, kur mjeshtri paraqitet si biznes — dokumenti i regjistrimit të biznesit.

Verifikimi konfirmon kush është mjeshtri. Ai nuk është certifikim i cilësisë së punës dhe nuk zëvendëson vlerësimet e klientëve.

Për mjeshtrit: çfarë ndodh me dokumentin që dërgon

Verifikimi është falas. Mjeshtri dërgon një foto të dokumentit të identitetit dhe një foto ku e mban dokumentin pranë fytyrës (që askush të mos verifikohet me dokumentin e dikujt tjetër); kush punon si biznes dërgon edhe dokumentin e regjistrimit të biznesit.

• Kush e sheh: vetëm ekipi që e shqyrton kërkesën për verifikim. Dokumenti nuk shfaqet në profil dhe nuk u jepet klientëve.
• Çfarë sheh klienti: vetëm shenjën "I verifikuar" — jo numrin e dokumentit, jo foton, jo adresën.
• Për çfarë përdoret: vetëm për të konfirmuar që emri në profil i përket personit real. Nuk përdoret për marketing dhe nuk u shitet të tretëve.
• Nëse refuzohet: të njoftojmë me arsyen (p.sh. foto e paqartë) dhe mund ta dërgosh sërish.

Edhe klientët konfirmojnë numrin e telefonit ose e-mail-in kur regjistrohen, dhe numri i telefonit të klientit i shfaqet mjeshtrit vetëm kur ka punë me të. Më shumë për mjeshtrit: si funksionon dhe sa kushton (regjistrimi, ofertat dhe verifikimi janë falas).

Çfarë nuk e garantojmë

• Nuk e mbikëqyrim punën në terren dhe nuk japim garanci teknike për të.
• Nuk mbajmë para në emër të palëve — pagesa bëhet drejtpërdrejt mes jush.
• Nuk mund të garantojmë se çdo profil i paverifikuar është i besueshëm.

Para se ta angazhosh një mjeshtër

• Krahaso së paku dy-tri oferta para se të vendosësh — çmimi më i ulët s'është gjithmonë më i miri.
• Lexo vlerësimet dhe shiko galerinë e punëve të kryera, jo vetëm yjet.
• Bisedo brenda platformës: historiku i bisedës është prova jote nëse diçka shkon keq.
• Bini dakord me shkrim për çmimin, afatin, materialet dhe kush i blen ato.
• Për punë të mëdha, ndaje pagesën në faza sipas punës së kryer.
• Kërko faturë ose dëftesë për pagesën.

Shenja paralajmëruese

• Kërkesa për të gjithë shumën paraprakisht, para se të fillojë puna.
• Insistimi për ta zhvendosur bisedën jashtë platformës që në fillim.
• Refuzimi për të dhënë çmim të shkruar ose për të lënë gjurmë të marrëveshjes.
• Presion për të vendosur menjëherë ("oferta skadon sot").
• Kërkesë për të dhëna bankare, kode OTP ose fjalëkalime — ne nuk i kërkojmë kurrë këto.

Si i trajtojmë mosmarrëveshjet

1. Bisedoni së pari. Shumica e problemeve zgjidhen me një bisedë brenda platformës.
2. Hap një rast. Nëse nuk arrini marrëveshje, hap një rast nga faqja e kërkesës.
3. Ne shqyrtojmë. Lexojmë bisedën, ofertat, fotot dhe afatet e regjistruara në platformë.
4. Vendimi. Ndërmjetësojmë dhe, kur ka shkelje të kushteve, marrim masa ndaj llogarisë përkatëse.

Ndërmjetësimi ynë bazohet në atë që është e dokumentuar në platformë. Prandaj bisedat dhe marrëveshjet brenda platformës janë në interesin tuaj.

Raporto një problem

Çdo profil, kërkesë ose mesazh mund të raportohet me butonin e raportimit. Për raste urgjente shkruaj te admin@kryje.com. Raportimet shqyrtohen nga ekipi dhe raportuesi nuk i zbulohet palës së raportuar.

Të dhënat e tua

Numri i telefonit dhe email-i nuk shfaqen publikisht te profili. Si i ruajmë dhe i përdorim të dhënat, shpjegohet te Politika e Privatësisë. Rregullat e plota gjenden te Kushtet e Përdorimit.