Si ta pastrosh filtrin e klimës
Filtri i pistë e bën klimën të ftohë më dobët, të harxhojë më shumë rrymë dhe të nxjerrë erë të keqe. Pastrimi zgjat 20 minuta dhe s'kërkon asnjë vegël të veçantë.
- Vështirësia: E lehtë
- Koha: 20 min
- Me video
Pse ia vlen
Filtrat mbajnë pluhurin, qimet dhe polenin. Kur zihen, ajri kalon me vështirësi: klima punon më gjatë për të njëjtën temperaturë, harxhon më shumë rrymë dhe me kohë fillon të nxjerrë erë myku. Në verë dhe në dimër, kur klima punon çdo ditë, filtrat pastrohen një herë në 2–4 javë.
Hapat
- Fik klimën me telekomandë dhe hiqe nga priza (ose ul siguresën e saj).
- Ngrije kapakun e përparmë të njësisë së brendshme nga skajet e poshtme — zakonisht hapet lart dhe qëndron vetë.
- Nxirr filtrat rrjetë duke i tërhequr lehtë poshtë dhe nga vetja. Vëre si janë vendosur, që t'i kthesh njësoj.
- Hiq pluhurin e trashë me fshesën me korrent (me furçë) ose duke i shkundur lehtë jashtë.
- Laji filtrat me ujë të vakët dhe pak detergjent të butë. Mos përdor ujë të nxehtë dhe mos i fërko me furçë të fortë — rrjeta griset.
- Lëri të thahen plotësisht në hije. Mos i thaj me tharëse flokësh dhe mos i fut të lagur.
- Fshi me leckë paksa të lagur kapakun dhe grilat e daljes së ajrit.
- Fute filtrin në vend, mbyll kapakun dhe ndize klimën.
Kur ta thërrasësh mjeshtrin
- Kur klima rrjedh ujë brenda në dhomë.
- Kur ftoh ose ngroh dobët edhe me filtra të pastër (mund t'i mungojë gazi).
- Kur njësia e jashtme bën zhurmë të fortë ose nuk ndizet.
- Për pastrimin e thellë të avulluesit dhe të kanalit të ujit, që bëhet me pajisje të veçanta një herë në vit.
Gjej një profesionist për klima & ngrohje
Mjeshtër me vlerësime reale nga klientët e platformës. Shiko profilin, krahaso, ose posto kërkesën dhe lëri ata të të gjejnë.

